CRTVG

Buscar

CRTVG Viva

Novas TVG

'Luar' recibe este venres a cantante malagueña Pasión Vega e a Budiño, un dos gaiteiros galegos máis internacionais

18/01/2019

A proposta musical desta noite complétase co ‘rock rústico’ de El Koala, coa singular proposta de A Banda dos Insectos e coas actuacións da orquestra New York, do Real Coro Toxos e Froles e do grupo de música tradicional Tahúme

'Luar' recibe este venres a cantante malagueña Pasión Vega e a Budiño, un dos gaiteiros galegos máis internacionais

Santiago, 18.01.2019.-  O programa ‘Luar’ (22.00 h.) recibirá hoxe a visita de Pasión Vega. A cantante malagueña presentará o seu novo disco, ‘40 quilates’, o seu oitavo traballo de estudio, unha proposta ecléctica e elegante, en que se reflicte a madurez e a experiencia adquirida tras máis de 20 anos de exitosa carreira musical.

Tamén presentará novo traballo en ‘Luar’ Budiño, un dos gaiteiros galegos máis internacionais. Despois de seis anos de silencio, publica o 25 de xaneiro ‘Fulgor’, un álbum con 100 cancións orixinais, compostas, producidas e cantadas por el mesmo, que constrúe un universo ultramoderno cun pé na raíz e outro no abismo.

Ademais, o espazo da TVG contará co ‘rock rústico’ de El Koala e coa singular proposta de A Banda dos Insectos, un proxecto enfocado a todos os nenos e nenas amantes do baloncesto, para que se familiaricen coa linguaxe deste deporte mediante a música.

A proposta musical desta noite complétase coas actuacións da orquestra New York, do histórico Real Coro Toxos e Froles, do grupo de baile e música tradicional Tahúme e da formación castelá Vigüela, que leva máis de 30 anos dedicados á música tradicional da Península Ibérica.

No tempo de ‘Recantos’, que esta semana comeza nova fase, con só 12 concursantes en liza, será a quenda de Dolores Tasende, representante da comarca Terras da Coruña, e Esteban Fuentes, procedente de Compostela.

ler máis

O programa de humor da Radio Galega 'Como que non?' poderase ver na tvG2

17/01/2019

A segunda canle da Galega ofrecerá cada venres (22.45 h.) o videopodcast deste show radiofónico, presentado por Carlos Tresandí, que ofrece monólogos, actuacións musicais e concursos

O programa de humor da Radio Galega 'Como que non?' poderase ver na tvG2

Santiago, 17,01.2019.-    Os medios públicos galegos continúan a establecer pontes e a partir deste venres a tvG2 ofrecerá, arredor das 22.45 h., o videopodcast de 'Como que non?', programa de humor e variedades da Radio Galega presentado por Carlos Tresandí. Co humor como bandeira e a participación do público en directo, trátase dun espazo de radio que tamén se adecúa moi ben á emisión televisiva.

Desde o bar The City de Vigo, a RG ofrece cada domingo á noite un show con monólogos, actuacións musicais e concursos, que a partir de agora tamén se poderá ver os venres na segunda canle da Galega. O programa estreouse en setembro de 2017 e nesta segunda temporada aumentou a súa duración.

'Como que non?' conta cada semana coa colaboración de Fernando Erre que Erre, encargado da sección 'Xeración espontánea', sobre os millennial; Iván Müller, que achega 'As preguntas de Chola'), e Alejandro Martínez "Pini".

Na emisión deste venres, o programa terá aos micrófonos e diante das cámaras o cómico, guionista e presentador Víctor Grande e a humorista Ángela Triana, unha das cómicas máis emerxentes da escena galega, cun monólogo fresco e dinámico en que fala da súa infancia e xuventude.

A música, outro dos piares de 'Como que non?', correrá nesta ocasión a cargo do dúo Two in the Mirror, que contan un extenso repertorio de versións de cancións soul, pop, jazz e funky.

ler máis

O coreógrafo Poty, amais de pintar a mona, coñecerá no 'Land Rober Tunai Show' o ritmo dos galegos bailando

17/01/2019

O actor vilagarcián Manuel Millán, o popular padre Nicanor en 'Pratos combinados', porá a proba o seu humor tamén esta noite no programa

O coreógrafo Poty, amais de pintar a mona, coñecerá no 'Land Rober Tunai Show' o ritmo dos galegos bailando

Santiago, 17.01.2019.-  Chega unha nova edición do 'Land Rober Tunai Show' (22.10 h.) para os seguidores do programa máis tolo da Televisión de Galicia. Roberto Vilar, xunto a Xosé A. Touriñán e Eva Iglesias, volverán superarse un xoves máis cos seus disparados sketchs e propostas de humor.     

Esta semana acudirá o televisivo Poty pintar a mona ao 'Land Rober Tunai Show'. O coñecido coreógrafo vai coñecer, en primeira persoa, o ritmo que ten o público galego nun enfrontamento de bailes en que pode pasar de todo.

Amais, Poty vai demostrar as súas táboas interpretativas nun sketch moi rural ao que se unirá o actor galego Manuel Millán, o famoso padre Nicanor de 'Pratos combinados', que porá a proba tamén o seu humor esta noite no programa.

ler máis

O marqués de 'Lobos e cordeiros' desconfía de que a súa muller estea detrás da liquidez dos Mendoza

16/01/2019

Mentres tanto, alguén do pazo está a colaborar en segredo con Pepa a Loba, a outra inimiga do nobre

O marqués de 'Lobos e cordeiros' desconfía de que a súa muller estea detrás da liquidez dos Mendoza

Santiago, 16.01.2019.- Televisión de Galicia ofrece hoxe o terceiro capítulo de “Lobos e cordeiros” (22.15 h.), serie de época ambientada a finais do século XIX en Ourense, que presenta tramas de intriga e amores imposibles entre unha familia nobre, outra burguesa e unha terceira campesiña.

Na entrega de hoxe, Mario é aceptado nunha escola de arte. Buscar a inspiración dos seus debuxos en Helena pode traerlle aínda máis problemas agora que o capitán Bermúdez quere comezar a cortexala.

Cando o marqués sabe que os Mendoza volven ter liquidez para continuar coas obras do balneario, desconfía da súa muller. Co que non conta é con que alguén do pazo está a colaborar tamén coa súa outra inimiga, nada menos que Pepa a Loba.

ler máis

Os 'Larpeiros' propoñen hoxe un menú informal, cun orixinal espeto de pavo con verduras e froitas

15/01/2019

O comensal máis viaxeiro percorrerá bares que son famosos polos seus saborosos bocadillos

Os 'Larpeiros' propoñen hoxe un menú informal, cun orixinal espeto de pavo con verduras e froitas

Santiago, 15.01.2019.-  Na casa dos 'Larpeiros' (22.45 h.) celebrarase hoxe unha comida informal, que existe máis alá das tapas e petiscos: os bocadillos, os sándwichs, os espetos... Plans que dan moitas alegrías! Con este propósito, Benigno propón cociñar uns espetos ben orixinais de pavo, con verduras e froitas, e acompañado tamén por unha ensalada de arroz. Un prato orixinal e cheo de sabor, que fará xunto á gran cociñeira Celia Cabrera.

Pola súa banda, o larpeiro máis viaxeiro, Adrián, está de sorte. Vai facer o que máis lle gusta, probar cousas ricas. Fará un interesante tour por bares, que son famosos polos seus deliciosos bocadillos. Algún mesmo con premios importantes por esta especialidade.

E a reposteira Merchi vai preparar unha lambetada sinxela e moi rica: mousse con picotas e galletas de canela. Un grande espectáculo doce, que fará posible grazas á querida Lola.

ler máis

Con 'Inimitables. 20 anos de Mareas Vivas', a TVG celebra as dúas décadas dunha das súas series históricas

14/01/2019

Actores e actrices, veciños e fans xúntanse en Laxe nunha festa por todo o alto (22.00 h.), con entrevistas, moita música e unha gran sorpresa final

Con 'Inimitables. 20 anos de Mareas Vivas', a TVG celebra as dúas décadas dunha das súas series históricas

Santiago, 14.01.2019.-    Actores e actrices, veciños e fans de 'Mareas Vivas' xúntanse hoxe en Laxe para celebrar un grande aniversario: os 20 anos dunha das series históricas da TVG, que fixo famosos a actores coma Luís Tosar, Miguel de Lira, Isabel Blanco e Luís Zahera, entre outros. Para celebralo por todo o alto, a TVG ofrece esta noite unha edición do programa 'Inimitables', conducida por Arturo Fernández, que se converterá nunha gran romaría, con moita música e festa e cunha gran sorpresa final.

Os espectadores de 'Inimitables. 20 anos de Mareas Vivas' verán como a serie deixou unha fonda pegada entre os veciños de Laxe, xa que moitos se involucraron persoalmente axudando o equipo de produción e outros mesmo foron actores de reparto. Os habitantes do lugar contarán simpáticas anécdotas, coma Manolo do Bahía, que ten un hotel e que foi construíndo máis alturas a medida que se ían gravando temporadas da serie.

A festa desta noite terá forma de romaría e celebrarase na lonxa de peixe, unha localización que empregaron na serie en diversas ocasións e que identifica esta vila mariñeira. Alí haberá polbeiros, gaiteiros e ata regueifeiros que crearán simpáticas composicións sobre os actores de actrices. Mercedes Peón, o Tren da Unha, as Pandeireteiras de Andora e o grupo de gaitas Marusía serán algunhas das actuacións.

No programa tamén haberá tempo para lembrar algúns dos grandes momentos da serie e para indagar se realmente existen en Laxe eses personaxes tan identificativos. Ademais, 'Inimitables' entrevistará as mulleres da vila que fixeron de extras e un percebeiro que é o vivo retrato de Currás. Tamén se verán os lazos establecidos entre os actores e os veciños, que os levaron a ter unha duradeira relación de amizade.

ler máis

Tomás presenta a súa dimisión no cuartel de "Serramoura" polo caso da Sobreira

13/01/2019

O suceso da intoxicación complícase ao descubrir probas de que alguén entrou na depuradora da localidade (22.25 h.)

Tomás presenta a súa dimisión no cuartel de "Serramoura" polo caso da Sobreira

Santiago, 13.01.2019.-    O crime da Sobreira cobrou unha nova vítima en “Serramoura”: Tomás presentou a súa dimisión para salvar o prestixio do cuartel, polo que Marga e Roi teñen que facer fronte a unha situación excepcional: resolver o caso e conseguir que Tomás recupere o seu posto.

Por se isto non fose suficiente traballo, o caso da intoxicación complícase por momentos. Hai probas de que alguén entrou na depuradora de Serramoura e iso non pode significar nada bo.

Mentres tanto, Daniel e Aurora seguen a voltas coa busca dunha casa onde vivir en Serramoura. A pesar da hospitalidade do seu xefe, Daniel quere marchar canto antes, pero Evaristo está facendo todo o posible por evitalo e así conseguir que Aurora caia nos seus brazos.

Pola súa parte, Santos está a punto de conseguir o seu obxectivo e facer que Pancho perda o apoio da súa banda criminal. Pero co que non contaba é con que Pancho tivese un plan para defenderse. Quen gañará a guerra?

ler máis

O programa 'Labranza' da Televisión de Galicia alcanza os 1.500 programas

12/01/2019

Leva 28 anos sendo testemuña da transformación do agro galego e contribuindo a espallar unha parte vital da nosa identidade

O programa 'Labranza' da Televisión de Galicia alcanza os 1.500 programas

Santiago, 12.01.2019.-    En marzo de 1991 chegaba ás pantallas da Televisión de Galicia un novo programa, 'Labranza', un espazo enfocado ao sector agrario creado por Anxo Vázquez. Cada domingo, durante 28 anos, o espazo foi testemuña da transformación do agro galego e contribuíu a espallar unha parte vital da identidade galega.

Este domingo celebrouse unha efeméride moi especial, xa que 'Labranza' chegou á súa emisión número 1.500. O programa, presentado por Manuel Cruz, é un dos máis antigos da TVG e mesmo supera o 'Luar', converténdose nun dos sinais de identidade da canle pública.

Antes de 'Labranza' existía na TVG outro programa centrado no mundo do campo, que tiña por nome 'A Terra'. Desde 1991, 'Labranza' leva 1.500 domingos ilustrando a realidade do campo galego a todos os fogares da nosa comunidade.

Ao longo destes 1.500 programas, 'Labranza' fixo un percorrido pola situación do campo galego, amosando o modo de vida de milleiros de labregos e labregas, e facendo divulgación das técnicas e coñecementos para axudalos no seu labor diario. Ao longo destes anos, o programa amosou os oficios e costumes da agricultura tradicional. Na actualidade, o programa mostra as últimas técnicas dos sectores produtivos ou a crecente industria alimentaria galega, así como o auxe da agricultura ecolóxica.

ler máis

"Bamboleo" recibe esta semana a visita de Víctor Manuel e Lucía Pérez

12/01/2019

O espazo presentado por Lucía Regueiro (22.00 h.) contará coas súas seccións habituais e coa actuación da orquestra Principal

"Bamboleo" recibe esta semana a visita de Víctor Manuel e Lucía Pérez

Santiago, 12.01.2019.-   O espazo de música e entretemento “Bamboleo” convida esta noite a subir ao seu escenario o cantautor asturiano Víctor Manuel, que, despois de dez anos, regresa cun álbum de cancións inéditas, “Casi nada está en su sitio”, co que reflexiona sobre a velocidade coa que se moven os acontecementos na actualidade.

O programa da TVG presentado por Lucía Regueiro tamén recibirá a visita da orquestra Principal e da cantante galega Lucía Pérez, que celebra 15 anos no mundo da música cun novo disco. Tras o éxito de “Quitapenas”, chega o seu sétimo álbum, titulado “Quince soles”, gravado integramente en galego e que contou coas colaboracións de Vizcaíno, Chenoa, Rosa Cedrón, Tonhito de Poi e Sito Sedes.

No escenario tamén estarán Laura, interpretando “Jardim com tempo” e Malejo, co tema “¿Y como es el?”, en versión de Marc Anthony, para competir ambos os dous na sección “Agora ou Nunca”.

Coma sempre, “Bamboleo” ofrecerá tamén as seccións “A ITV do amor”, onde un concursante terá que adiviñar cal é a verdadeira parella dunha persoa a partir de certas probas; “A Jrileira”, onde Isaías e Mónica se enfrontarán ao karaoke cantando “Felices los cuatro”, de Malume, e “Dirtidansi”.

ler máis

A película 'Elisa e Marcela', participada pola TVG, competirá polo Oso de Ouro na Berlinale

11/01/2019

O filme da directora Isabel Coixet trata sobre o primeiro matrimonio de mulleres na historia, celebrado en Dumbría en 1901 entre dúas mestras galegas

A película 'Elisa e Marcela', participada pola TVG, competirá polo Oso de Ouro na Berlinale

Santiago, 11.01.2019.-     A película 'Elisa e Marcela', dirixida pola cineasta catalá Isabel Coixet e que conta coa participación da Televisión de Galicia, participará na sección oficial a competición do Festival de Cine de Berlín que se celebrará do 7 a 17 de febreiro na capital alemá.

Coas actrices Natalia de Molina e Greta Fernández como protagonistas e cun amplo elenco galego, 'Elisa e Marcela' trata sobre o primeiro matrimonio de mulleres na historia, celebrado en Dumbría en 1901 entre dúas mestras galegas que, tras seren descubertas, ocuparon as portadas de diarios de todo o mundo.

O filme rodouse a primavera do ano pasado  na comarca de Fisterra e nas cidades de Pontevedra, Santiago e A Coruña. A galega Zenit coproduce a película sobre unha historia convertida en icónica loita pola igualdade de dereitos e a liberdade sexual.

ler máis