CRTVG

Buscar

CRTVG Viva

Hoxe en TVG

Cine de estrea na TVG con "Lobos Sucios", película ambientada na Galicia de 1944, cos nazis explotando unha mina de volframio

23/04/2018

A ópera prima de Simón Casal de Miguel, con Marian Álvarez e Manuela Vellés como protagonistas, conta unha historia de supervivencia, espionaxe e amor que puido cambiar o curso da Segunda Guerra Mundial

Cine de estrea na TVG con "Lobos Sucios", película ambientada na Galicia de 1944, cos nazis explotando unha mina de volframio

Santiago, 23.04.2018.-     O cine galego de estrea volve este luns á TVG cunha nova entrega do ciclo “Por fin é luns!”, que esta noite ofrecerá a película “Lobos Sucios” (22.10 h.), ópera prima de Simón Casal de Miguel, que ten como protagonistas a Marian Álvarez, Manuela Vellés, Ricardo de Barreiro, Xosé Manuel Esperante e Luísa Merelas.

Inspirada libremente en feitos, historias e personaxes reais, o filme conta unha historia de supervivencia, espionaxe e amor en medio dunha atmosfera máxica: Galicia no ano 1944, cos nazis explotando unha mina de volframio, un mineral imprescindible para o seu armamento.

Nesas minas traballa duro Manuela para poder curar a súa filla enferma. A súa vida cambiará para sempre coa chegada duns espías aliados coa misión de executar un gran roubo de volframio. Os aliados prometen curar a súa filla a cambio da súa axuda. Sen ser moi conscientes, Manuela e a súa aloucada irmá pequena Candela, que inocentemente axuda xudeus a fuxir pola fronteira, veranse envoltas de cheo na Segunda Guerra Mundial.

ler máis

Despois de recibir un vídeo de Rebeca, atopala sa e salva convértese nunha prioridade para o cuartel de "Serramoura"

22/04/2018

Mentres tanto, Moncho está preocupado por Raquel, convertida nunha empresaria sen escrúpulos, ao máis puro estilo Soutelo

Despois de recibir un vídeo de Rebeca, atopala sa e salva convértese nunha prioridade para o cuartel de "Serramoura"

Santiago, 22.04.2018.- Os espectadores da TVG verán hoxe como a desaparición da representante da Wood Corp se converteu nun problema para o cuartel de “Serramoura” (22.15 h.) ata que reciben un vídeo en que se ve a Rebeca pedindo perdón polos seus actos. Nese intre, todas as suposicións mudan cara á certeza de que Rebeca está secuestrada e atopala sa e salva convértese nunha prioridade para Tomás. Pero as distraccións non tardan en chegar. Comandancia quere pechar o caso o máis axiña posible e envía a Serramoura o tenente Víctor Somoza, que, máis que axudar, sabotará os intentos de Marga e Diego por atopar a Rebeca.

Mentres tanto, Moncho está preocupado por Raquel. A responsabilidade no serradoiro e ser a propietaria dos montes de Serramoura converteu a maior dos Neira nunha empresaria sen escrúpulos, ao máis puro estilo Soutelo, e Moncho intentará poñer fin a esa deriva que nada ten que ver con quen Raquel é en realidade.

Ao mesmo tempo, Hugo quere poñer fin a presenza da Wood Corp en Serramoura. Aproveitando a volta de Evaristo, pídelle axuda ao seu antigo xefe para acabar coa empresa americana.

Ademais, Santos recibe a Emilia, unha filla dun dos seus mellores amigos e antigo colaborador nos seus negocios criminais, que está de paso en Serramoura para aprender os métodos de Santos.   

ler máis

O espazo “Pescadores de Historias” retrata esta tarde o renacer do vello estaleiro de Bueu

22/04/2018

Falarase da importancia de Banda do Río para manter vivas as raíces desta vila mariñeira

O espazo “Pescadores de Historias” retrata esta tarde o renacer do vello estaleiro de Bueu

Santiago, 22.04.2018.-  O barco é o obxecto central da cultura mariñeira, como hoxe comprobará o programa “Pescadores de Historias” (15.40 h.). É un espazo de traballo e tamén ten detrás moito traballo, o que se desenvolve nos estaleiros e carpinterías de ribeira. O espazo da TVG estará en Bueu, no estaleiro da Banda do Río, hoxe pechado, onde se construían barcos desde a década de 1920 ata 2003. Foi recoñecido como Ben de Interese Cultural e vai ser reconstruído para que unha parte da historia do mar de Galicia volva ser presente.

“Pescadores de Historias” sairá navegar no Playa de Covelo, o último barco feito no estaleiro de Bueu. O seu armador e patrón é José Manuel Agulla e nel sae pescar todos os días.

A asociación Os Galos, que centra o seu traballo na cultura mariñeira e, en especial, nas embarcacións tradicionais, é un colectivo que traballou con esforzo para que o coñecido como o estaleiro de Purro non se perdera para sempre, conscientes do que suporía esta perda para manter vivas as testemuñas das raíces da vila mariñeira de Bueu. O presidente dos Galos, Víctor Rodríguez, amosará no programa a súa enorme satisfacción pola rehabilitación do estaleiro.

Ademais, a concelleira de Bueu Silvia Carballo explicará por que é tan importante para o concello e para os veciños e veciñas de Bueu siga en pé e Covadonga López de Prado, directora do Museo Massó, onde se integrará o estaleiro unha vez reconstruído, falará do que significou para o desenvolvemento da vila. X.H. Rivadulla Corcón tamén falará co patrón maior José Manuel Rosas, que comentará o importante que foi para Bueu poder contar cun estaleiro emprazado no propio porto.

Pero un estaleiro ou unha carpintería de ribeira necesitan das mans expertas e traballadoras de homes e mulleres para que teña vida plena. O programa coñecerá o último carpinteiro de ribeira que traballou neste espazo, Manolo Purro, que traballou durante toda a súa vida no estaleiro da Banda do Río.

“Pescadores de Historias” rematará hoxe o seu percorrido na taberna O Pescador, onde Mari Carme Ferradás, unha verdadeira coñecedora do xeito de ser dos homes e mulleres do mar, preparará un linguado ao forno.

ler máis

O programa "Bamboleo" recibe esta noite no escenario o dúo musical Azúcar Moreno

21/04/2018

Tamén actuarán a orquestra Metrópolis e Ruxe Ruxe, senlleiro grupo da música rock galega (22.05 h.)

O programa "Bamboleo" recibe esta noite no escenario o dúo musical Azúcar Moreno

Santiago, 21.04.2018.-   O espazo de música e entretemento “Bamboleo” convida esta noite as irmás Salazar, Azúcar Moreno, a subir ao escenario. Toñi e Encarna, que levan máis de 30 anos de carreira e que chegaron a representar a España no Festival de Eurovisión, interpretarán temas como “Que me quiten lo bailao”, “No me des guerra” e “Quitémonos la ropa”.

Tamén actuarán esta noite no programa a orquestra Metrópolis e Ruxe Ruxe, senlleiro grupo da música rock galega que, coa súa persoal proposta musical, baseada nunha contaxiosa fusión de rock, punk, folk, música tradicional e ska, celebrou xa 20 anos espallando a súa música por toda a xeografía galega.

No escenario tamén estarán Alys Parama, interpretando “Adagio”, de Lara Fabián, e Awatif el Arfaoui, co tema “Man down”, de Rihanna, competindo ambos os dous na sección “Agora ou Nunca”.

Coma sempre, “Bamboleo” ofrecerá tamén as seccións “A ITV do amor”, onde un concursante terá que adiviñar cal é a verdadeira parella dunha persoa a partir de certas probas; “Déixate de Juasá”, que animará a Conchi e Paula a prescindir de tanto trebello tecnolóxico; “A Jrileira”, onde Amelia e Jorge se enfrontarán ao karaoke cantando “Havana”, de Camilla Cabello, e “Dirtidansi”, en que parellas de distintas xeracións bailarán hoxe tango, bachata, salsa, rumba e bolero.

ler máis

O "Aquí Galicia" acode esta tarde ás festas de Corcubión, onde gozará da súa contorna e da súa riqueza artística e gastronómica

21/04/2018

O espazo que presentan Lucía Rodríguez, Juan Fuentes e Bernardo Montaña (16.25 h.) achegaralles aos espectadores as estrelas da súa cociña: o polbo, a empanada de mazá, o pan de ovo e a torta de améndoa

O "Aquí Galicia" acode esta tarde ás festas de Corcubión, onde gozará da súa contorna e da súa riqueza artística e gastronómica

Santiago, 21.04.2018.-    O “Aquí Galicia” viaxará hoxe a Corcubión, xa que a vila celebra a súa festa patronal en honra a San Marcos. O festexo servirá como escusa para que o equipo do programa coñeza a súa paisaxe e as súas riquezas artísticas e culinarias.

Falando de gastronomía, o espazo que presentan Lucía Rodríguez, Juan Fuentes e Bernardo Montaña achegaralles aos espectadores as estrelas da súa cociña: o polbo, con seis preparacións diferentes; a empanada de mazá, coñecida como coca; o pan de ovo e a torta de améndoa.

“Aquí Galicia” comezará o percorrido polo paseo marítimo da localidade. Coñecerá tamén a praza Castelao, as casas burguesas e as igrexas da zona. Na contorna descubrirá o cabo Cee, o castelo do Cardeal, o campo de san Roque e o miradoiro de Ramón Pais.

Despois de facer un repaso polas festas máis destacadas da vila, os mariñeiros e mariñeiras falarán da estreita relación de Corcubión co mar. “Aquí Galicia” compartirá, amais, unha xornada cos rapaces dos colexios da zona que participan no programa ‘O mar na escola’, co que se pretende achegar o mundo do mar aos máis pequenos.

Coma en todo gran festexo, o programa contará coas actuacións da orquestra Trébol, da Banda de Música de Cee, do cantante muradán Gonzalo Brea, do grupo de danza tradicional Xaldón, das pandeireteiras As Xaviñanas e As Rinchonas, do grupo de baile Nerio e unha peza dos grupos Peta Forte e Terra de Sena.

ler máis

"Vivir Aquí" fará hoxe balance dos últimos meses pasados por auga, en que Galicia enlazou unha borrasca tras outra

21/04/2018

Os reporteiros do programa (15.45 h.) comprobarán se esa chuvia case constante aliviou a seca

"Vivir Aquí" fará hoxe balance dos últimos meses pasados por auga, en que Galicia enlazou unha borrasca tras outra

Santiago, 21.04.2018.-   Despois de varios meses cunha borrasca detrás doutra, Galicia está metida de cheo na primavera e por fin comezaron a subir os termómetros e a saír o sol. Se o ano pasado deixou a preocupación da seca, este comezou pasado por auga. Así que o programa “Vivir Aquí” quere comprobar hoxe se esa chuvia case constante aliviou a escaseza de meses pasados.

Os reporteiros da TVG visitarán o concello de Galicia onde máis chove e os lugares onde convidados inesperados como Félix ou Gisele, se presentaron con vento, ondas e escuma ata o pé das casas.

Ademais, “Vivir Aquí” falará co director de Aemet en Galicia, irá a lugares onde gandeiros e veciños viviron con preocupación a seca e comprobará como o agro se adapta a estes cambios tan repentinos.

ler máis

Blas Cantó presenta esta noite o seu último sinxelo en "Luar", que tamén contará coa presenza do arpista Rodrigo Romaní

20/04/2018

O espazo da TVG tamén contará coa presenza de dúas cantantes ás que a vocación lles vén de familia: Chayo Mohedano e Celia Flores

Blas Cantó presenta esta noite o seu último sinxelo en "Luar", que tamén contará coa presenza do arpista Rodrigo Romaní

Santiago, 20.04.2018.-   O cantante murciano Blas Cantó estará esta noite en “Luar” para ofrecer un adianto do seu novo disco, que verá a luz esta primavera. Tras o éxito de “In your bed” (que tamén cantará no programa) e “Drunk and Irresponsible”, presenta agora “Él no soy yo”, o seu primeiro sinxelo en español, unha canción con influencias pop-folk que o consagra coma unha das promesas da música en España.

Tamén estará hoxe no escenario de “Luar” Rodrigo Romaní, o máis recoñecido arpista galego. O música presentaralle ao público e á audiencia o seu último disco, “Fíos de ouro no ár”, un álbum concibido para recrear un xogo sónico de luces e sombras, de penumbras estilísticas, de discursos entreverados con alusións a músicas de diversas orixes en que a tradición oral da música popular vertebra un produto inconfundiblemente galego.

Por outro lado, o espazo da TVG recibirá a visita de dúas cantantes ás que a vocación lles vén de familia: Chayo Mohedano e Celia Flores. A sobriña de Rocío Jurado interpretará o seu último sinxelo, “A la que venga”, mentres que a filla de Marisol cantará temas do disco homenaxe que lle dedicou á súa nai: “20 anos de Marisol a Pepa Flores”.

A proposta musical do “Luar” desta semana complétase coas actuacións da agrupación folclórica A Pastoriza, da formación Airiños de Orzabai, do grupo de baile tradicional Armadanzas de Laraño, do grupo folclórico Aires do Pilar e do grupo de coros e danzas salmantino Montaraces y Charros.

No tempo de “Recantos”, enfrontaranse nesta ocasión María Vidal, de Terras de Ordes, e Marc Alonso, representante da comarca de Bergantiños. Finalmente, no concurso “Vai de Baile” será a quenda dos dúos Rebuxeiros de Beiramar e Firmenus Melitonus.

ler máis

A explosiva Alba Carrillo acode este xoves a pintar a mona ao "Land Rober Tunai Show"

19/04/2018

A modelo participará en sketchs e en distintas probas, que avaliarán o seu sentido do humor

A explosiva Alba Carrillo acode este xoves a pintar a mona ao "Land Rober Tunai Show"

Santiago, 19.04.2018.-  Este xoves volve a revolución ao “Land Rober Tunai Show” (22.15 h.) coa visita de Alba Carrillo. A modelo converterase na noiva de Xosé Antonio Touriñán por uns minutos que deixarán os espectadores coa boca aberta. Serán a parella do momento ou o pasado volverá para facer das súas?

Por se isto fose pouco, a convidada desta edición enfrontarase ao maior reto da televisión, xa que unha noite máis volven as palabriñas máis rebuscadas no ‘Que me estás contando?’.

Coma cada xoves, a audiencia gozará tamén dos mellores sketchs e os retos máis divertidos con Roberto Vilar, Xosé Antonio Touriñán e Eva Iglesias.

ler máis

A TVG celebra o 15º aniversario de Os Dous de Sempre, o célebre dúo cómico formado por Touriñán e Pereiro

18/04/2018

O programa especial “Volve Mucha e Nucha. 15 anos ten Ardebullo” fará un percorrido por todos os momentos cheos de gargalladas que lle brindaron á audiencia

A TVG celebra o 15º aniversario de Os Dous de Sempre, o célebre dúo cómico formado por Touriñán e Pereiro

Santiago, 18.04.2018.-  Os Dous de Sempre, o célebre dúo cómico formado por Xosé Antonio Touriñán e Marcos Pereiro, fan 15 anos xuntos, así que a Televisión de Galicia emitirá un programa especial este mércores á noite para celebrar tal acontecemento. Coa súa peculiar retranca, Os Dous de Sempre celebrarán este aniversario no especial “Volve Mucha e Nucha. 15 anos ten Ardebullo”.

O programa fará un percorrido por todos os momentos cheos de gargalladas deste mítico dúo cómico formado por Touriñán, que conseguiron meterse nas casas dos galegos e galegas e levan 15 anos facendo rir a fartar os espectadores. Desde as famosas Cantareiras, as dúas irmáns máis coñecidas de Galicia, que puxeron Ardebullo no mapa coas súas versións musicais e as trasnadas das fillas da Conexa, Mucha e Nucha, ou as creacións máis sorprendentes de Xosé Ramón e o seu pinche Moncho, pasando polos efectivos dispositivos de Silveira e Fandiño coa súa Protessión Sivil.

Xuntar todos os personaxes que encarnan traducirase esta noite nun inevitable sorriso para a audiencia, á que a TVG convidará a brindar por moitos anos máis rindo con Os Dous de Sempre.

ler máis

Chega o gran día para Héctor e Carmela en "Viradeira", que esta noite emite o último capítulo da temporada

17/04/2018

Coas coordenadas do Augusta no seu poder e o científico entretido na súa propia voda, os “trangalleiros” irán tras o tesouro

Chega o gran día para Héctor e Carmela en "Viradeira", que esta noite emite o último capítulo da temporada

Santiago, 17.04.2018.-  Por fin chegou o gran día en “Viradeira” (22.35 h.), que hoxe emite o último capítulo da temporada. Dorneda acolle por fin a voda do ano, en que se unirán en matrimonio Carmela, a dona do mesón, e Héctor, o científico que chegou á vila na busca dun tesouro e que semella que se fixo co máis valioso de todos. Pero, lonxe de ser un día tranquilo para os noivos, os problemas xurdirán a cada paso.

E é que Héctor está enfadado coa súa nai por ocultarlle a separación do seu pai e agora non quere que asista á cerimonia. Pola súa parte, Carmela está pensando en hipotecar o seu negocio para pagar a fianza do seu pai e conseguir que Manel saia do cárcere. Está tan preocupada con este asunto que nin sequera ten moi claro en que vai acabar o da voda.

Por outro lado, en Dorneda celébranse eleccións municipais o mesmo día, polo que os convidados están un pouco revoltos. Roxelio, o alcalde saínte, dubida da súa capacidade para vender o seu tío na loita pola alcaldía. Mentres, Encarna, a muller máis poderosa da vila, prepara un moi pouco lícito plan para, coa axuda de Macario e Chino, asegurar a vitoria de Muxo. Así que pode pasar de todo nas urnas.

Ademais, non hai que esquecer que continúa a busca do Augusta e que os “trangalleiros” dispoñen das coordenadas do pecio. Con Héctor entretido coa súa voda, esta vez non deixarán pasar a oportunidade de facerse co tesouro.

ler máis