CRTVG

Buscar

CRTVG Viva

A diversión está garantida esta noite no 'Land Rober Tunai Show' coa participación de Cristina Castaño e Carlos Blanco

21/03/2019

A xornalista e presentadora Inma Morandeira enfrontarase ao peor trago do programa: o ovo cru con vinagre

A diversión está garantida esta noite no 'Land Rober Tunai Show' coa participación de Cristina Castaño e Carlos Blanco

Santiago, 21.03.2019.-  O mellor humor volve este xoves á Televisión de Galicia cunha nova entrega de ‘Land Rober Tunai Show’ (22.25 h.), que xuntará dous grandes intérpretes do noso país, a vilalbesa Cristina Castaño e o arousán Carlos Blanco. Nesta visita coñecerán a Casa Dosinda e os seus manxares... Miña nai! En que rematará esta participación?

No ‘Land Rober’ deste xoves haberá tamén unha nova achega do 'Quen vés sendo?', onde Roberto Vilar e colaboradores xogarán con Inma Morandeira. A xornalista e presentadora deberase enfrontar ao castigo máis suculento do ‘Land Rober’: o ovo cru con vinagre. Quen será a señora que sorprenderá desta vez os espectadores?

Esta noite, amais, no transcurso do programa volverán as palabriñas máis rebuscadas e divertidas no ‘Que me estás contando!’, en que intervirán co sentido do humor que os caracteriza Cristina Castaño e Carlos Blanco.

ler máis

Manuel Manquiña únese hoxe ao elenco actoral de 'Malo será!' nunha nova entrega desde o Auditorio de Ourense

20/03/2019

Os espectadores asistirán a un número de ventriloquia, á sesión dunha adiviña ou mesmo a un programa de televisión para atopar o amor, entre outros sketches (22.15 h.)

Manuel Manquiña únese hoxe ao elenco actoral de 'Malo será!' nunha nova entrega desde o Auditorio de Ourense

Santiago, 20.03.2019.-  O itinerante 'Malo será!', programa da Galega que achega a televisión aos teatros do noso país, chega ata Ourense coa súa delirante proposta de humor, protagonizada polos mellores cómicos da escena galega. Ao elenco habitual de artistas, que lidera cada mércores Marta Doviro, uniráselle esta noite como convidado especial o actor Manuel Manquiña.

Nesta ocasión, desde o auditorio municipal de Ourense e baixo o título Aí vén o maio, asistirase a un número de ventriloquia, á sesión dunha adiviña ou mesmo a un programa de televisión para atopar o amor. Os espectadores serán testemuña ademais da investigación dun crime nun portal e ata dun divorcio… con final feliz, entre outros sketches humorísticos.

Amais de Manuel Manquiña, poderase gozar sobre o escenario coas actuacións de Marcos Pereiro, Federico Pérez, Lucía Veiga, Cristina Andrade, Carmen Méndez, Santi Romay e Marita Martínez.

ler máis

Os embutidos reinan hoxe na mesa dos 'Larpeiros', con guiso de pavo con chourizo

19/03/2019

Adrián viaxará a Manzaneda para coñecer todos os segredos da preparación das androllas (22.00 h.)

Os embutidos reinan hoxe na mesa dos 'Larpeiros', con guiso de pavo con chourizo

Santiago, 19.03.2019.-   Este martes tratarase un asunto moi serio na mesa dos ‘Larpeiros’: os embutidos. Os protagonistas do programa celebrarán os seus sabores intensos e gustosos e falarán especialmente dos chourizos, un produto do que son admiradores e que proporciona moito sabor na cociña.

Benigno Campos quere hoxe sorprender os comensais e decide cociñar un estupendo guiso de pavo con chourizo, unha receita diferente, pero que non deixa de ser tradicional. Ao seu carón terá, como é habitual, a gran Lola, así que na cociña de ‘Larpeiros’ non faltará sabedoría e moita ledicia. Ademais, para a sobremesa Merchi e Leni prepararán unha torta de mazá con froitos secos.

Mentres, Adrián desprazarase nesta ocasión ata Manzaneda, no corazón da provincia de Ourense, para visitar dous reputados elaboradores de chourizos e androllas e coñecer todos os segredos destes ricos embutidos.

ler máis

Mentres Aurora se debate entre a vida e a morte, Helena e o capitán preparan a súa festa de compromiso, en 'Lobos e cordeiros'

18/03/2019

Marta non só terá que buscar axuda para a súa amiga, senón que tamén terá que decidir se vestir ela mesma o traxe que a converte na Loba

Mentres Aurora se debate entre a vida e a morte, Helena e o capitán preparan a súa festa de compromiso, en 'Lobos e cordeiros'

Santiago, 18.03.2019.-   No capítulo desta noite de 'Lobos e Cordeiros' (22.10 h.), Aurora debátese entre a vida e a morte. Marta non só terá que buscar unha axuda discreta para curar a quen xa considera unha amiga, senón que tamén terá que decidir se vestir ela mesma o traxe que a converte na Loba.

Pola súa parte, Helena e o capitán van celebrar a súa festa de compromiso. É un evento ao que acudirán as personalidades máis distinguidas de Viguña, a non ser que Violeta -ou Mario- consigan impedilo.

ler máis

Chega esta noite o xuízo contra Micaela Morais, o momento agardado por todos en 'Serramoura'

17/03/2019

O que ninguén sospeita é que a líder dos rusos aproveitará ata o último segundo para negociar

Chega esta noite o xuízo contra Micaela Morais, o momento agardado por todos en 'Serramoura'

Santiago, 17.03.2019.-  Chegou o gran día para o cuartel de ‘Serramoura’ (22.00 h.). O xuízo contra Micaela Morais acaba de comezar e tanto Roi como Marga están desprazados nos xulgados para dar apoio ao operativo e vixiar os movementos de Micaela.

A xuíza Tania Crespo está convencida que o de hoxe vai ser un gran día para todos os que participaron na busca e captura de Micaela, pero o que non sospeitaba é que a líder dos rusos aproveitará ata o último segundo para negociar.

Ao mesmo tempo, o cuartel de Serramoura enfrontarase a unha situación límite: un grupo de homes armados teñen como obxectivo secuestrar o posto de mando.

ler máis

O espazo 'Bamboleo' ofrece este sábado as actuacións de Las Ketchup, Edgar Bao e a orquestra La Favorita

16/03/2019

O espectáculo e o entretemento familiar están garantidos no programa presentado por Lucía Regueiro, que ofrecerá tamén as súas seccións habituais

O espazo 'Bamboleo' ofrece este sábado as actuacións de Las Ketchup, Edgar Bao e a orquestra La Favorita

Santiago, 16.03.2019.-   O espectáculo e o entretemento familiar chegan, un sábado máis, ao programa ‘Bamboleo’ (22.00 h.), que hoxe contará coa presenza de Las Ketchup, que en 2002 converteron o seu famoso ‘Aserejé’ en éxito mundial e lograron captar a atención de todo o planeta co seu apegadizo baile. 17 anos despois de converterse nunhas das artistas musicais máis globais do noso país, as irmás Muñoz volverán interpretar este hit no espazo da TVG, ademais doutros temas novos.

Tamén está convidado a esta velada musical o mozo lucense Edgar Bao, unha nova promesa da canción, que saltou á fama ao participar nun coñecido concurso de talentos para rapaces. Como é habitual, o espazo presentado por Lucía Regueiro seguirá ofrecendo as actuacións das mellores orquestras do momento, coa visita esta noite de La Favorita.

Polo demais, ‘Bamboleo’ ofrecerá este sábado as súas seccións habituais, entre as que se atopan ‘Agora ou Nunca’, onde competirán Saray López cantando ‘El Patio’, de Pablo López, e Antonio Fernández, que interpretará ‘Sólo te pido’, de Manolo Escobar.

En ‘A ITV do amor’, un concursante terá que adiviñar cal é a verdadeira parella dunha persoa a partir de certas probas; en ‘A Jrileira’, David e Juan José competirán coas súas voces no karaoke; en ‘Dirtidansi’, parellas de distintas xeracións bailarán salsa e bachata e ‘A Jrileira’ convidará dúas persoas e prescindir de trebellos tecnolóxicos e falar á cara.

ler máis

Na compaña de rondallas, o ‘Aquí Galicia’ prepárase para vivir a Noite das Pepitas en Ferrol

16/03/2019

O espazo falará da tradición desta festa e amosará os emprazamentos máis destacados da cidade departamental

Na compaña de rondallas, o ‘Aquí Galicia’ prepárase para vivir a Noite das Pepitas en Ferrol

Santiago, 16.03.2019.-   O ‘Aquí Galicia’ (16.25 h.) é partícipe hoxe en Ferrol da celebración previa á Noite das Pepitas, que cada ano ten lugar na véspera do san Xosé. Nesta festa, en que se homenaxea as mulleres, os ferroláns, ataviados con capas, percorren as rúas con diversos instrumentos musicais. O programa fará un percorrido pola tradición deste evento, con máis de 120 anos de traxectoria, desde os seus inicios ata a actualidade, apoiado por imaxes antigas que achegarán a súa esencia histórica. Unha tradición que se mantén viva, amais, na vila veciña de Mugardos, onde celebran un concurso de adornos de balcóns, que tamén se amosará no transcurso do espazo.

Un dos elementos principais desta festa é a música, presente en todo momento tanto no festival como polas rúas, cando os homes roldan as mulleres baixo os balcóns, en formacións de rondallas. Hoxe, os espectadores coñecerán máis sobre estas agrupacións, os seus traxes e os seus costumes.

Nesta edición, que presentan Lucía Rodríguez, Bernardo Montaña e Juan Fuentes desde a praza da Constitución da cidade, amosarase como é a vida no porto ferrolán e a súa frenética actividade, investigarase cal é a rúa máis cara e a máis barata, descubrirase onde se pode ir de viños e a tomar as mellores tapas e visitarase o arsenal militar.

Xa que o ‘Aquí Galicia’ asiste á Noite das Pepitas, ao longo do programa contarase con rondallas, as súas máximas representantes musicais. Neste senso, sobre o escenario intervirán Club de Campo, Sonido del Alba, Añoranzas e Bohemios. Tamén achegará os seus sons a nova orquestra Ciclón, o Real Coro Toxos e Froles, a agrupación Encrucillada e Chylava, o actual gañador do concurso Recantos de ‘Luar’.

No apartado gastronómico degustaranse algúns doces típicos ferroláns, entre os que destaca o bico das Pepitas, a larpeirada máis representativa destas datas na cidade departamental.

ler máis

O programa 'Luar' recibe esta noite o cantante David Civera, que presentará o seu novo sinxelo

15/03/2019

O espazo da TVG (22.00 h.) tamén contará coas actuacións de Ángela Carrasco, King África, a orquestra Solara e a Escolanía da Catedral de Santiago, entre outros

O programa 'Luar' recibe esta noite o cantante David Civera, que presentará o seu novo sinxelo

Santiago, 15.03.2019.-    O programa ‘Luar’ convida esta noite a subir ao seu escenario a David Civera, que lle presentará ao público e aos espectadores o seu novo sinxelo, ‘Mundo diverso’, un dos temas máis fondos, persoais e reivindicativos do artista, cargado de solidariedade e diversidade. Trátase do anticipo do seu novo EP, ‘Empatía’, que sairá á venda o vindeiro mes de abril. Este novo proxecto do cantante turolense chega tras a publicación en 2017 de ‘15 años’, un álbum co que quixo celebrar o seu 15º aniversario na música e en que, ademais de incluír os temas de máis éxito da súa traxectoria, incluíu algunhas composicións inéditas.

O espazo presentado por Xosé Ramón Gayoso e Patricia Fernández Santana tamén ofrecerá a actuación da cantante dominicana Ángela Carrasco, unha das mellores voces da canción en español e unha das divas de América Latina durante os anos 70 e 80.

Outro dos convidados deste venres é o incombustible artista arxentino King África, pai da banda sonora de moitos veráns, que volve apostar polos ritmos estivais con ‘El tembleque’, canción que interpretará esta noite, ademais de ‘El cocodrilo’.

O cartel musical desta noite complétase coa orquestra Solara; o músico, presentador e actor Paco Lodeiro, a Escolanía da Catedral de Santiago e o Coro de Lingua de Signos de Cacheiras, que cantarán conxuntamente o ‘Hallelujah’; a asociación cultural canguesa O Viveiro de Peis D’Hos e a Banda de Música de Santádega, procedente do concello ourensán de Coles.

Polo demais, o espazo da TVG comeza este venres unha nova edición do concurso ‘Vai de Baile’ infantil, coa participación cada semana de dúas parellas de nenos/as, e contará coa intervención en ‘Recantos’ de Esteban Fuentes, representante de Terras de Compostela, e Alberte Suárez, procedente de Ourense norte.

ler máis

Ana Obregón encontrarase co rei emérito no 'Land Rober Tunai Show', que recibe tamén a David Perdomo

14/03/2019

Ademais, a celebrity enfrontarase a chamadas inesperadas no xogo máis perigoso do programa: o ‘Mira quen chama’’ (22.25 h.)

Ana Obregón encontrarase co rei emérito no 'Land Rober Tunai Show', que recibe tamén a David Perdomo

Santiago, 14.03.2019.-    Roberto Vilar e compañía agardan esta noite os espectadores da Televisión de Galicia co mellor humor nunha nova entrega do programa ‘Land Rober Tunai Show’. Nesta ocasión, o espazo da TVG recibirá a visita da celebrity Ana Obregón, que se vai atopar co rei emérito nun encontro un tanto peculiar. Que deparará esta ‘quedada real’?

Ademais, vai ser unha noite de moita tensión, porque volve o xogo máis perigoso, o ‘Mira quen chama!' Ana Obregón e Roberto Vilar enfrontaranse ás chamadas máis inesperadas. Con que sorprenderán desta vez?

Para coñecer os segredos das novas xeracións volve o ‘Non llo digas a mamá!’, con protagonistas ben coñecidos. Deste xeito, as risas están aseguradas nun show ao que se une tamén David Perdomo.

ler máis

A actriz Sabela Arán únese ao espectáculo do 'Malo será!', esta noite, desde o auditorio Gustavo Freire de Lugo

13/03/2019

Os espectadores coñecerán o ratiño Pérez, serán testemuña de como transcorre un día nunha tenda de aldea e asistirán a outra historia da nosa familia primitiva

A actriz Sabela Arán únese ao espectáculo do 'Malo será!', esta noite, desde o auditorio Gustavo Freire de Lugo

Santiago, 13.03.2019.-  O programa itinerante ‘Malo será!’ (22.15 h.), que cada semana achega a televisión a un dos teatros do noso país, chega hoxe Lugo para ofrecer dúas horas de humor encabezadas polos mellores cómicos da escena galega. Este mércores á noite, a actriz Sabela Arán unirase como convidada especial á tropa habitual de humoristas do espazo.

Nesta ocasión, desde o auditorio Gustavo Freire de Lugo, será protagonista de novo a familia máis primitiva que, nesta ocasión, practica o tiro de pedra, o salto de pértega e algunha outra disciplina propia dos xogos olímpicos. Os espectadores coñecerán, ademais, o ratiño Pérez e serán testemuña dun día nunha típica tenda de aldea, entre outros sketches humorísticos.

Amais de Sabela Arán, poderase gozar sobre o escenario coas actuacións de Marcos Pereiro, Federico Pérez, Lucía Veiga, Cristina Andrade, Oswaldo Digón, Marita Martínez, Santi Romay e Pedro Brandariz. Un elenco liderado por Marta Doviro, a presentadora deste formato de éxito, que o pasado verán obtivo sensacionais datos de audiencia na televisión e encheu todos e cada un dos teatros onde estivo.

ler máis