CRTVG

Buscar

CRTVG Viva

A xornalista da CRTVG Alba Mancebo gaña o premio europeo ao Novo Talento en Pantalla

16/04/2019

Este galardón Prix Circom, que nesta edición bateu récord de candidaturas, 255 en doce categorías diferentes, entregarase nunha gala en maio no marco da Conferencia Anual en Serbia
 
Tras a serie ‘Matalobos’, que acadara o Premio á Mellor Ficción de TV en Europa, esta é a segunda ocasión en que a CRTVG recibe esta prestixiosa distinción internacional

A xornalista da CRTVG Alba Mancebo gaña o premio europeo ao Novo Talento en Pantalla

Santiago, 16.04.2019.- As televisións públicas rexionais europeas asociadas en Circom acaban de concederlle a unha profesional da CRTVG o prestixioso Premio Prix Circom ao Novo Talento en Pantalla (Young Talent on Screen), segundo acaba de facer público hoxe o organismo internacional. O galardón entregarase o próximo 30 de maio nunha gala que se celebrará no marco da 37 Conferencia Anual en Novi Sad, Serbia.

Para esta edición do certame, a CRTVG presentou unha selección dalgunhas das intervencións da xornalista vimiancesa Alba Mancebo diante das cámaras. Na súa curta traxectoria nos medios públicos galegos, Alba, de 26 anos, desenvolveu distintas tarefas nos espazos informativos, tanto para achegarlle á audiencia informacións de actualidade como intervir en apartados máis desenfadados do magazine ‘A Revista’ e mesmo nas redes sociais da Corporación, onde promove o uso da lingua galega cada semana cunha divertida sección denominada #instaGal.

Para a xornalista, gañar este galardón ábrelle un horizonte laboral moi atractivo, xa que o Prix Circom, ademais de outorgar un trofeo e certificado, posibilitaralle unha estadía nunha das 32 televisións membro de Circom, para aproveitar o bo facer doutra canle. “Estou moi contenta! Se non fose polas oportunidades que me están dando na CRTVG, non tería material para enviar a un certame coma este. E con moitas ganas de ir a Serbia”, sinalou ilusionada ao coñecer a resolución do premio.   

Esta é a segunda vez que a CRTVG acada un Prix Circom. A serie ‘Matalobos’, na categoría de Mellor Ficción de Televisión en Europa, supuxo en 2012, en Suecia, a primeira ocasión en que os medios públicos galegos obtiveron o prestixioso Prix Circom, o maior galardón internacional que o mundo da televisión lle concedeu á TVG na historia da canle galega. O programa ‘No bico un cantar’ e unha reportaxe de ‘Deporte extra’ foron tamén distinguidos, a posteriori, con respectivas mencións especiais no Prix Circom.

Este ano, o Prix Circom acadou un récord de presentacións, con 255 candidatas, repartidas entre 12 categorías. Circom, presente en 30 países europeos, anunciará o premio principal, Grand Prix, que é elixido entre estes gañadores, na propia gala do día 30 de maio.

ler máis

O tesouro das nosas hortas sérvelles aos 'Larpeiros' para elaborar un orixinal suflé de peixe sapo e grelos

16/04/2019

As reposteiras prepararán hoxe un pastel de amorodos, unha das lambetadas máis desexadas polos pequenos

O tesouro das nosas hortas sérvelles aos 'Larpeiros' para elaborar un orixinal suflé de peixe sapo e grelos

Santiago, 16.04.2019.- A conversa no almorzo da casa dos 'Larpeiros' (22.00 h.) está hoxe moi animada. Benigno lembra o importantes que son os peixes na súa cociña, sobre todo o bacallau. Para a convidada, a gran cociñeira guardesa Chus Castro, na súa casa non pode faltar unha lagosta. E falando e falando, Leni nomea o tesouro verde das nosas hortas: os grelos, unha das verduras máis características da cociña galega, empregada máis aló dos pratos clásicos. Chus deixa alucinados os comensais coa súa proposta: un suflé de peixe sapo e grelos. Benigno será o encargado de axudala para que o prato sexa todo un éxito.

Pola súa parte, Adrián, o larpeiro máis viaxeiro, irá ata Vilalba, na Terra Chá, para facer conservas de grelos, unha gran opción para poder comelos todo o ano. Divina, que dirixe a empresa familiar xunto ao seu pai, será a encargada de amosar todos os segredos desta arte. Esta experta en grelos argalla innovadoras receitas con este manxar.

E, para rematar un menú tan especial, as reposteiras Merchi e Leni prepararán un pastel de amorodos, unha das lambetadas máis bonitas, ricas e desexadas polos máis pequenos.

ler máis

A TVG ofrece, dentro do espazo ‘Bos días’, un debate electoral entre representantes do PP, PSOE, En Común-Unidas Podemos, En Marea e BNG

15/04/2019

Emitirase este martes, en directo, ás 10.00 horas, moderado por Fran L. Iglesias

A TVG ofrece, dentro do espazo ‘Bos días’, un debate electoral entre representantes do PP, PSOE, En Común-Unidas Podemos, En Marea e BNG

Santiago, 15.04.2019.-  Televisión de Galicia continúa co seu plan de cobertura electoral, cunha cita destacada este martes no espazo Bos días, que albergará en directo un debate, dunha hora de duración, coas forzas políticas con representación no Congreso, PP, PSOE e En Común-Unidas Podemos, amais das forzas políticas significativas, En Marea e BNG.

Participarán neste debate electoral da TVG Marta González, candidata número 2 do PP pola Coruña; Pablo Arangüena, número 2 pola Coruña do PSdeG-PSOE; Yolanda Díaz, candidata número 1 por Pontevedra de En Común-Unidas Podemos; Iván Olmos, número 1 por Ourense de En Marea, e Néstor Rego, candidato número 1 do BNG pola Coruña.

A orde de intervención para abrir o debate será primeiro o PP, a continuación o PSdeG-PSOE, En Común-Unidas Podemos, deseguido En Marea e, en último lugar, o BNG. Para pechalo, a orde será á inversa: comezará o BNG, seguido de En Marea, a continuación En Común-Unidas Podemos, logo o PSdeG-PSOE e, para rematar, o PP.

Unha vez iniciado o debate, ás 10.00 horas, os tempos non se marcan, son libres. Será Fran L. Iglesias o moderador que vele polo equilibrio das intervencións.

ler máis

Éxito de audiencia do primeiro concerto de 'Notas de jazz' da RG, que foi seguido por máis de 5.000 persoas a través de Facebook Live

15/04/2019

O grupo galego Sumrrá actuou na Casa das Crechas en Compostela no marco dos concertos Notas de jazz

Esta é unha das apostas da Radio Galega en redes sociais a partir dos contidos musicais, sendo o proxecto Medio Bolo outro dos seus piares de innovación
  

Éxito de audiencia do primeiro concerto de 'Notas de jazz' da RG, que foi seguido por máis de 5.000 persoas a través de Facebook Live

Santiago, 15.04.2019.- Radio Galega Música segue a establecer novas relacións coa audiencia aproveitando as posibilidades que permiten as ferramentas dixitais para achegar os sons galegos e os distintos xéneros musicais ao público máis novo. Nesta ocasión, os usuarios do Facebook da Radio Galega puideron gozar do concerto que o grupo galego Sumrrá, considerado un dos novos referentes do jazz contemporáneo, deu na Casa das Crechas en Santiago de Compostela.

A audiencia respaldou esta nova proposta, xa que  máis de 5.000 persoas seguiron nalgún momento a  actuación de Sumrrá a través de Facebook Live, arredor de 1.000 en directo. Ademais, o programa especializado en jazz dirixido por Xabier Facal acadou unhas 50 reaccións dos usuarios e foi compartido máis de 30 veces.

Os usuarios do Facebook da Radio Galega foron testemuña da actuación deste grupo de jazz, con seis discos ás costas e uns 20 anos de traxectoria. Neste recital, o trío compostelán presentou seu último disco, 6 mulleres, un álbum en que rende tributo a seis mulleres que foron e aínda son fonte de inspiración no reto dun futuro mellor. Nesta achega á loita feminista desde a música contemporánea, Sumrrá lembra a Rosalía de Castro, Frida Kahlo, Malala Yousafzai, Rosa Parks, Qiu Jin e Nawal El-Saadawi.

O concerto estará dispoñible nos audios da web da Radio Galega e na sección #cultura365 da páxina da CRTVG. En canto aos próximos concertos que se ofrecerán en Noite de jazz, neste mes de maio actuará Marcos Teira, guitarrista galego que fusiona o jazz co flamenco como sinal de identidade.


ler máis

Con 'A noite de Superpiñeiro', os espectadores coñecerán un pouco mellor un dos presentadores estrela da historia da TVG

15/04/2019

Artistas, músicos, amigos e compañeiros da televisión e do mundo académico farán un percorrido pola traxectoria persoal e profesional deste rostro icónico da Galega (22.05 h.)

Con 'A noite de Superpiñeiro', os espectadores coñecerán un pouco mellor un dos presentadores estrela da historia da TVG

Santiago, 15.04.2019.-  A TVG ofrece esta noite o programa especial 'A noite de Superpiñeiro', que lles permitirá aos espectadores coñecer un pouco mellor un dos presentadores estrela da historia da Televisión de Galicia, ver algunhas das súas mellores actuacións musicais e percorrer con Xosé Manuel Piñeiro os diferentes momentos da súa carreira profesional na Galega.

Coa intervención de amigos e compañeiros do mundo da televisión e tamén do mundo académico, coñecerase un pouco mellor o Piñeiro mestre e o Piñeiro amigo. Antigos compañeiros da Universidade Laboral de Ourense, onde traballou, colaboradores de moitos dos seus programas, tanto da Radio Galega coma da Televisión de Galicia, e artistas e músicos amosarán un Xosé Manuel Piñeiro descoñecido polo seu público.

Diana Nogueira, Paula Pérez e Isi lembrarán o seu paso polo mítico 'Supermartes'. Sonia López, Inma Morandeira e Juan Fuentes falarán da época do 'Acompáñenos'. Lucía Pérez, Tonhito de Poi e Sevi Martínez contarán as súas experiencias con Piñeiro en programas coma 'Téquele, Téquele' ou 'Tequelexou'. Tamén, do seu papel coma xurado no concurso de Recantos de 'Luar', darán testemuña Tania Fuegho e Manuel De Andrade e moitos máis amigos e compañeiros que quixeron falar da súa relación con Pi.

En definitiva, moitos colaboradores e amigos para coñecer un pouco mellor a traxectoria persoal e profesional do gran Super Piñeiro. Todo isto salpicado con diferentes actuacións musicais dun grande artista, coas que a audiencia da TVG gozará esta 'Noite de Superpiñeiro'.

ler máis

Neste capítulo de 'Serramoura', Santos vese obrigado a aceptar a proposta do pai de Múriel de traballar para el

14/04/2019

Mentres tanto, Teresa abandona a xestión do serradoiro e busca comprador para o negocio, oportunidade que chama a atención de Evaristo

Neste capítulo de 'Serramoura', Santos vese obrigado a aceptar a proposta do pai de Múriel de traballar para el

Santiago, 14.04.2019.-   Despois do asasinato de Eduardo por parte de Máximo, no capítulo desta noite de ‘Serramoura’ (22.05 h.), Santos vese obrigado a aceptar a proposta do pai de Múriel para traballar para el. O seu primeiro encargo é o de soterrar o corpo de Eduardo e despois deberá prender lume aos montes da vila.

No cuartel non tarda en chegar unha mensaxe anónima sobre o lugar onde está o corpo de Eduardo e Tomás encárgalle a Roi e Marga a investigación do acontecido.

Mentres tanto, a situación do serradoiro Soutelo é insostible. Teresa abandonou a xestión da empresa e agora busca comprador para o negocio. Consciente da oportunidade, Evaristo non tardará en lanzar unha oferta para conseguilo.

Ao mesmo tempo, Moncho está de volta na vila despois da súa viaxe, pero o seu comportamento errático fai saltar as alarmas de Raquel e Marga. O que non esperaban foi a explicación de Moncho ao seu estado.

ler máis

'Bamboleo' recibe hoxe no seu escenario a Los Secretos, historia viva da música española

13/04/2019

O programa presentado por Lucía Regueiro ofrecerá tamén as actuacións da Companhia do Ruído e da orquestra Charleston Big Band

'Bamboleo' recibe hoxe no seu escenario a Los Secretos, historia viva da música española

Santiago, 13.04.2019.-  'Bamboleo' (22.00 h.), o programa da Televisión de Galicia da noite dos sábados, recibirá hoxe no escenario o mítico grupo madrileño Los Secretos, un dos referentes do pop nacional e banda sonora de varias xeracións de españois. A banda acaba de rematar a súa exitosa xira do 40 aniversario e agora está inmersa na preparación e presentación do seu novo disco, ‘Mi paraíso’. Deste xeito, os espectadores poderán escoitar esta noite temas que forman parte da historia musical española, coma ‘Déjame’ e ‘Pero a tu lado’.

Coma sempre, no espazo da TVG hai lugar para a música galega e o seu representante desta semana será A Companhia do Ruído, banda de world-music cuxa proposta é unha orixinal cocteleira de estilos en que a irreverencia e a retranca son as capitás dunha viaxe que parte da música popular galega para chegar a ritmos de latitudes internacionais coma os caribeños ou balcánicos. Con máis dunha década sobre os escenarios, teñen publicados sete discos e están a elaborar o seu oitavo traballo discográfico, que será lanzado ao longo deste ano.

O programa presentado por Lucía Regueiro ofrecerá tamén a actuación da orquestra Charleston Big Band, que interpretará temas tan coñecidos ‘Déjala que baile’ e ‘El anillo’.

Ademais, 'Bamboleo' contará hoxe, coma cada sábado, coas súas seccións habituais. En ‘Agora ou Nunca’, dous participantes, Lucía Tarrio e José Ramón Agra, amosarán os seus dotes artísticos. A primeira, interpretando ‘Hago chas y aparezco a tu lado’, de Álex y Cristina, e a segunda, con ‘Hoy tengo ganas de ti’, de Alejandro Fernández. En a ‘ITV do amor’, o obxectivo será  acertar cal é a verdadeira parella dunha persoa.

‘Déixate de juasá!’ animará a Rafa e Victoria a prescindir de trebellos tecnolóxicos e dicir as cousas á cara, e ‘A Jrileira’ enfrontará ao karaoke dous concursantes: Yago e Carla, que interpretarán ‘Corazón contento’, de Marisol. Ademais, en ‘Dirtidansi’, a parella formada por Javi e Cris bailará salsa e showdance.

ler máis

Sábado de fútbol na RG, coa narración do Atlético-Celta e Osasuna- Dépor, vitais para os equipos galegos

12/04/2019

Amais, as ondas públicas narrarán os partidos de fútbol sala do Burela feminino e masculino e o baloncesto galego de ACB

Sábado de fútbol na RG, coa narración do Atlético-Celta e Osasuna- Dépor, vitais para os equipos galegos

Santiago, 13.04.2019.- O ‘Galicia en goles’ celebra esta fin de semana o éxito de audiencia alcanzado no primeiro trimestre do ano. O primeiro Estudio Xeral de Medios sitúa o programa deportivo da Radio Galega como o preferido polos oíntes ao mediodía e na noite dos domingos, día en que suma 62.000 oíntes, tres mil máis que o sábado.

Para esta xornada, o equipo que dirixe Xoán Galán ten preparado un amplo despregamento nos partidos da Liga de Fútbol Profesional. O sábado a atención estará posta no Metropolitano, onde o Celta de Vigo, sen Iago Aspas, visita o Atlético de Madrid, sen Diego Costa. Tras saír dos postos de descenso, o equipo vigués buscará continuar coa súa boa xeira sen o seu xogador máis destacado.

Mentres, Martí debuta como adestrador do Deportivo da Coruña ante o líder da Segunda, o Club Atlético Osasuna, no Sadar de Pamplona, nun partido chave para as aspiracións de ascenso do equipo coruñés.

O fútbol sala completa a axenda do día coa posible festa do ascenso do Burela ante o Noia, en Vista Alegre, e a continuación o decisivo encontro entre o equipo feminino e o Atlético Futsi na loita pola Liga de Primeira División.

Ademais do ‘Galicia en goles’, a Radio Galega ofrece o sábado tres espazos deportivos máis. Ás doce do mediodía, Alfonso Pardo dedicará ‘Convivir deportivo’ á Agrupación Deportiva Tomiño. Pola noite, Rodrigo Pérez prenderá ás once os motores do ‘Gas a fondo’ e ás once e media Toni López García adicará o espazo olímpico ‘Galicia en Toquio’ á vela, conversando co vigués Nico Rodríguez.

O domingo, ás doce, a edición matinal estará centrada no Real Madrid - Obradoiro da Liga ACB, xunto ao Celta-Inter da Segunda B e o As Pontes-Castro de Preferente, en que o equipo local vai celebrar o regreso á Terceira División. Desde as tres menos cuarto, a edición da tarde retransmitirá o Córdoba-Lugo desde o Arcángel, un encontro decisivo para os dous equipos para permanecer na Segunda División A. A partir das sete e media, o programa dedicará toda a atención ao Estudiantes-Breogán, un encontro con sabor a final para escapar do descenso na Liga ACB de baloncesto.

Ás once da noite, a mesa de debate de ‘Ao contraataque’ completará a fin de semana deportiva. Este programa converteuse en líder absoluto de audiencia, cun seguimento de 48.000 persoas, segundo o último EXM. Os oíntes poden seguir este faladoiro a través da FM, TDT, radiogalega.gal e app, ademais de ver a emisión polo streaming Mira RG, unha plataforma en que poden poñerlle cara aos analistas que escoitan cada domingo.

ler máis

A tvG2 ofrece, en directo, o posible ascenso do Burela fútbol sala e a loita polo título do equipo feminino

12/04/2019

Este fin de semana tamén haberá tempo para os mellores partido de Segunda B

Sábado de fútbol na RG, coa narración do Atlético-Celta e Osasuna- Dépor, vitais para os equipos galegos

A tvG2 ofrece, en directo, o posible ascenso do Burela fútbol sala e a loita polo título do equipo feminino

Santiago, 12.04.2019.-  Nesta fin de semana, a oferta deportiva da CRTVG terá o fútbol sala como principal atractivo, xa que se poden confirmar o ascenso a primeira división do Burela e o título do equipo feminino.

A tvG2 ofrecerá en directo a partir das 17.30 horas o derbi galego Pescados Rubén Burela – Noia Portus Apostoli, partido que pode significar o ascenso do equipo lucense. Os homes de Juanma Marrube, con 9 puntos de vantaxe sobre o segundo, só precisan un empate para subir de categoría nun pavillón de Vista Alegre ateigado para a ocasión. En caso de que se produza o ascenso, a tvG2 ofrecerá en directo as reaccións dos protagonistas.

Ás 20.00 horas é a quenda do equipo feminino, que se enfronta ao Atlético Féminas no mellor partido da categoría e que decidirá o campionato. As galegas teñen unha vantaxe de 3 puntos e se gañan terían case asegurado o título de Liga. O partido tamén se poderá seguir en directo na web da CRTVG.

O domingo, o fútbol de Segunda B será a principal oferta deportiva nos medios públicos. Ás  12.00 horas os espectadores da tvG2 poderás seguir en directo o Celta B– Internacional de Madrid. O encontro tamén se poderá seguir pola web da CRTVG.

Ás 14.30 h. será a quenda para o montañismo, cunha entrevista con Félix Criado e Alex Txikon, centrada no seu intento de ascendo a un dos cumios máis altos do mundo, o K2, en pleno inverno

Pola tarde, a partir das 16.30 h., comeza “A liga das cidades”, cos mellores encontros de Segunda B. Os espectadores poderán seguir o Fabril – Atlético de Madrid B, un encontro difícil para o filial coruñés, que chega como pechacancelas da categoría. Máis tarde, a partir das 18.00 horas poderase seguir o derbi pontevedrés Coruxo – Pontevedra. Os encontros tamén se poderán seguir na web da CRTVG.

O ‘En xogo’ bota o peche da xornada deportiva, amosando todos os resumos da xornada e as declaracións dos protagonistas

ler máis

A TVG presenta desde hoxe en 'Feito con cabeza' o talento creativo dos galegos a través dos seus inventos

12/04/2019

Personaxes anónimos e profesionais amosarán as súas innovadoras ideas e narrarán as súas propias historias, en que se combina innovación e tecnoloxía

A TVG presenta desde hoxe en 'Feito con cabeza' o talento creativo dos galegos a través dos seus inventos

Santiago, 13.04.2019.- Televisión de Galicia pon en valor desde hoxe o talento das mentes creativas galegas, tanto anónimas coma recoñecidas, a través do novo espazo 'Feito con cabeza'. Cun formato de docu-reallity e dirixido por Carlos A. Quirós, en cada entrega entrelázanse tres historias diferentes, en que os protagonistas narrarán as súas propias historias, que mesturan a tecnoloxía de empresas punteiras na innovación cos inventos máis cotiáns, feitos por creadores non profesionais para dar resposta a situacións domésticas.

E é que Galicia é terra de lendas e de meigas, pero tamén de inventores. Desde un precursor fisterrá, Alexandre Campos, que en plena guerra civil creou o futbolín, pasando polo estradense Ramón Verea, que patentou a calculadora, ou á mestra ferrolá Ángela Ruiz Robles, que ideou en 1949 un libro predecesor das tabletas electrónicas actuais, ata o biólogo coruñés Antonio Vilar que, en 2009, inventou un aparello para ensinar os nenos a dar os seus primeiros pasos, ‘Feito con Cabeza’ dará a coñecer as persoas que destacan polas súas innovadoras ideas. Só durante o ano pasado, os galegos rexistraron máis de 200 patentes.  

En 'Feito con cabeza', cada protagonista, profesional e anónimo, falará do seu invento máis destacado, de como xurdiu a necesidade de idealo e do proceso creativo, amais de presentar algún prototipo e de explicar como o sacaron adiante. O programa terá tamén un apartado histórico, en que se coñecerá como se levou a cabo algún grande invento realizado por galegos.

Hoxe son protagonistas os inventores Xulio, Vicente e Angelita

Na súa estrea, 'Feito con cabeza' visita Vigo e a Xulio, un enxeñeiro electrónico. Xulio leva anos fabricando básculas que pesan moitos obxectos. Tanto obxectos coma mortos ou incluso alcaldes...

Por outra banda, entrarase na casa de Vicente, en Mougás, montador de feiras xubilado que constrúe aparatos para mellorar o día a día. Vicente tamén ten tempo para axudar os veciños. Pastor e a súa porca Pepa sábeno ben.

A inventora histórica de hoxe inspirou a Steve Jobs. Mestra en Ferrol, dona Angelita desenvolveu a mediados do século XX un precursor do libro electrónico e das actuais tabletas: a enciclopedia mecánica.

Verase se os inventos de Xulio, Vicente e Angelita cumpren o que prometen e se cumpren cun denominador común: ser feitos con moi boa cabeza.

ler máis